ნორმების დადგენა  დიდი ჯგუფების გაზომვისა და სტანდარტიზების შედეგად ხდება  და იმისთვის არის საჭირო, რომ ინდივიდის და ამა თუ იმ ჯგუფის ნორმები ერთმანეთს შედარდეს.

ტესტირების შედეგად მიღებულ ქულებს ცალკე არავითარი მნიშვნელობა არ გააჩნია, ვიდრე მათ არსებულ, სტატისტიკურ ნორმებს არ შევადარებთ. სტატისტიკურ ნორმაში ერთიანდება სხვა ინდივიდების ტიპური ქულები, რაც წარმოდგენას გვაძლევს იმის შესახებ,  ჩვეულებრივ, რა დიაპაზონში ნაწილდება ერთსა და იმავე ასაკისა და სქესის ინდივიდების მიერ მიღებული ქულები. აგრეთვე, ნორმით, ვიგებთ, როგორია ამ ინდივიდების გასაშუალოებული ქულა.

პოპულაციის რეპრეზენტაციული ნორმების დადგენა საკმაოდ შრომატევადი და ძვირადღირებული დავალებაა, განსაკუთრებით როდესაც  საქმე სხვადასხვა რეგიონში მცხოვრებ, განსხვავებული სქესის, ეთნიკური წარმომავლობის, განათლების, სოციალური კლასისა  და ასაკის ინდივიდებთან გვაქვს.  

მიუხედავად ამისა, ვიდრე ტესტს გამოვიყენებდეთ, აუცილებლად უნდა დავრწმუნდეთ, რომ ჯგუფისთვის დამახასიათებელი, ადეკვატური ნორმები განსაზღვრული გვაქვს. წინააღმდეგ შემთხვევაში დაიკარგება კონტექსტი და ტესტის შედეგის ინტერპრეტაცია არასანდო იქნება. ამასთანავე, ტესტის შექმნელები რეგულარულად უნდა ზრუნავდნენ ტესტისა და არსებული ნორმების განახლებაზე, რათა მონაცემები არ გახდეს მოძველებული.

*** 

გამოყენებული ლიტერატურა:  

გერიგი, ზიმბარდო (2009). ფსიქოლოგია და ცხოვრება, მე-16 გამოცემა. თსუ, თბილისი.

Kazdin, A. E. (Ed.) (2000). Encyclopedia of psychology. 8 Volume Set. Vol. 1