გაიატრი ჩაკრავორტი სპივაკი

Gayatri Chakravorty Spivak

გაიატრი ჩაკრავორტი სპივაკი (დაბ. 1942 წ.) ინდოელი ლიტერატურის თეორეტიკოსი, ფემინისტი, მარქსისტი, პოსტკოლონიური კრიტიკოსი, თარჯიმანი და დეკონსტრუქტივისტია. მისი ყველაზე ცნობილი ნაშრომია „შეუძლია სუბალტერნს ლაპარაკი?“, სადაც ის მსჯელობს რეპრეზენტაციის სხვადასხვა მნიშვნელობასა და ფორმაზე. სუბალტერნი, სპივაკის განმარტებით, არის ის, ვინც სტრუქტურულად გარიყულია და ვისი ამბოხიც უჩინარია. ამიტომ სპივაკი კრიტიკულად იაზრებს ზოგიერთი ფემინისტური თეორეტიკოსის ან სუბალტერნის კვლევების ჯგუფის წარმომადგენლის მოთხოვნას ჩაგრულთა მოსმენის, მათ ნაცვლად ლაპარაკის შეწყვეტის, „ისტორიის ქვემოდან წერისა“ და სხვ. შესახებ. სპივაკს ეკუთვნის ტერმინი „სტრატეგიული ესენციალიზმი“, რაც აღნიშნავს ჩაგრული ჯგუფების მიერ საკუთარი ჯგუფის დროებით ესენციალიზაციას, რათა გაჩნდეს სოლიდარობა და სოციალური აქტივიზმის შესაძლებლობა. 1999 წელს მან გამოაქვეყნა „პოსტკოლონიური გონების კრიტიკა“. აკადემიურ მოღვაწეობასთან ერთად გაიატრი სპივაკმა დააარსა ორგანიზაცია, რომელიც მუშაობს მასწავლებლებთან, რათა მათ შეძლონ უღარიბესი რაიონის მოსწავლეებისთვის სათანადო განათლების მიცემა. 

*** 

გამოყენებული ლიტერატურა: 

Code, L. (Ed.). (2000). Encyclopedia of Feminist Theories. London & New York: Routledge

კატეგორია: 
ავტორები: